काठमाडौं । नेकपा एमालेको पार्टी पुनर्गठन कार्यदल र सचिवालय बैठक आज बस्दैछ। केन्द्रीय कमिटी बैठकअघि निर्वाचन समीक्षा, पुनर्गठन कार्यदलको प्रतिवेदन तथा केन्द्रीय कमिटीमा प्रस्तुत हुने प्रतिवेदनबारे निष्कर्षमा पुग्न बैठक बस्न लागेको हो।

एमाले प्रचार विभाग प्रमुख निरज आचार्यका अनुसार पुनर्गठन कार्यदलको बैठक बिहान ९ बजे पार्टी कार्यालय च्यासलमा बस्नेछ। कार्यदलमा यसअघि दुईवटा प्रतिवेदन पेस भएकाले तिनलाई समेटेर एउटै प्रतिवेदन तयार गर्ने विषय मुख्य एजेण्डा छ। कार्यदल बैठकपछि दिउँसो १ बजे सचिवालय बैठक बस्नेछ।

कार्यदलमा प्रतिवेदनबारे यसअघि समझदारी नजुटेकाले आजको बैठकलाई महत्वका साथ हेरिएको छ। सचिवालय बैठकपछि भोलिदेखि असोज ७ गतेसम्म केन्द्रीय कमिटी बैठक बस्दैछ। ललितपुरको भनिमण्डलस्थित रामबाग महलमा हुने बैठकमा अध्यक्ष केपी शर्मा ओलीले प्रतिवेदन प्रस्तुत गर्ने एमालेले जनाएको छ।