नुवाकोट । भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलले नुवाकोटका बाढी प्रभावितको अवस्था, अस्थायी तथा स्थायी पुनस्र्थापना र दीर्घकालीन व्यवस्थापनका विषयमा स्थानीय तहका जनप्रतिनिधि तथा सरोकारवालासँग छलफल गरेकी छन्।

बिहीबार नुवाकोट पुगेकी मन्त्री रावलले विदुर नगरपालिका र बेलकोटगढी नगरपालिकाका प्रभावित नागरिकको अवस्था, होल्डिङ सेन्टरमा रहेका नागरिकको व्यवस्थापन, अस्थायी तथा स्थायी पुनस्र्थापना र भूमिहीनहरूको दीर्घकालीन व्यवस्थापनलगायत विषयमा जनप्रतिनिधि, प्रमुख प्रशासकीय अधिकृत, प्रमुख जिल्ला अधिकारी तथा सुरक्षा निकायका प्रमुखसँग छलफल गरेकी हुन् ।

छलफलका क्रममा मन्त्री रावलले बाढी प्रभावित परिवारको दीर्घकालीन व्यवस्थापन तथा पुनस्र्थापनाका लागि संघीय सरकारका तर्फबाट आवश्यक सहयोग उपलब्ध गराउने प्रतिबद्धता जनाइन् ।

उनले तत्कालीन राहतसँगै प्रभावित परिवारको सुरक्षित तथा दीर्घकालीन व्यवस्थापनलाई प्राथमिकतामा राखेर काम गर्ने बताइन् । साथै, होल्डिङ सेन्टरमा रहेका व्यक्तिहरूको विवरण यथाशीघ्र उपलब्ध गराउन स्थानीय तहलाई आग्रह गरिन् ।