काठमाडौं । रसुवाको भोटेकोसी खोलामा आएको बाढीपछि नेपाल रेडक्रस सोसाइटीले उद्धार, राहत तथा स्वास्थ्य सेवाका लागि कर्मचारी र स्वयंसेवक परिचालन गरेको छ।

बाढी प्रभावित नागरिकलाई थप सहयोग उपलब्ध गराउन नेपाल सरकारसँगको समन्वयमा रेडक्रसले राहत तथा मानवीय सहायता कार्यलाई निरन्तरता दिएको सोसाइटीका अध्यक्ष डा. विशालकुमार भण्डारीले जानकारी दिए।

सरकारले निर्धारण गरेको क्लस्टर प्रणालीअनुसार सेवा प्रवाह भइरहेको र महिला, बालबालिका, ज्येष्ठ नागरिक तथा अपाङ्गता भएका व्यक्तिलाई प्राथमिकतामा राखेर सहायता उपलब्ध गराइएको उनले बताए।

बाढी प्रभावित क्षेत्रमा अत्यावश्यक स्वास्थ्य सामग्रीको अभाव हुन नदिन रेडक्रसले सोमबार नेपाली सेनाको हेलिकप्टरमार्फत अत्यावश्यक औषधिसहित आवश्यक सामग्री रसुवा पठाएको छ।

विपत्पछि प्रभावित समुदायको आवश्यकता पहिचान गरी सोहीअनुसार राहत तथा स्वास्थ्य सामग्री उपलब्ध गराउने कामलाई प्राथमिकताका साथ अघि बढाइएको रेडक्रसले जनाएको छ।