काठमाडौं । भोटेकोशी नदीमा शुक्रबार बिहानदेखि पानीको बहाव पुनः बढेपछि रसुवादेखि चितवनसम्मका नदी तटीय क्षेत्र र उद्धारमा खटिएका टोलीलाई सतर्क रहन आग्रह गरिएको छ।

भदौ १० गते तिब्बततर्फबाट आएको बाढीमा परी प्रभावित तथा बेपत्ता भएकाहरूको खोज तथा उद्धार कार्य भइरहेका बेला भोटेकोशीमा पानीको बहाव फेरि बढेको हो। राष्ट्रिय विपद् जोखिम न्यूनीकरण तथा व्यवस्थापन प्राधिकरणले सूचना जारी गर्दै रसुवाको भोटेकोशी नदीमा बाढीको बहाव थप बढेको जानकारी प्राप्त भएको जनाएको छ।

प्राधिकरणले रसुवा, नुवाकोट, धादिङ र चितवनलगायत प्रभावित क्षेत्रमा खोज, उद्धार तथा राहतमा खटिएका सुरक्षाकर्मी, उद्धारकर्ता तथा नदी तटीय क्षेत्रमा रहेका सर्वसाधारणलाई विशेष सतर्कता अपनाउन आग्रह गरेको छ। यसैबीच, बाढी पूर्वानुमान महाशाखाका अनुसार धादिङस्थित त्रिशूली नदीमा जलसतह खतराको तहभन्दा करिब ३ मिटर माथि पुगेको छ।

नदीको बहाव थप बढ्न सक्ने सम्भावनालाई मध्यनजर गर्दै तटीय क्षेत्रका बासिन्दालाई सुरक्षित स्थानमा रहन र नदी किनारमा नजान आग्रह गरिएको छ।

बाढी प्रभावित क्षेत्रमा खोज तथा उद्धार कार्य जारी रहेकाले उद्धारकर्ताले समेत नदीको बहाव र सम्भावित जोखिमको अवस्था बुझेर मात्र काम गर्न सम्बन्धित निकायले आग्रह गरेको छ।