काठमाडौं । देशका विभिन्न स्थानमा बाढी तथा प्रतिकूल मौसमका कारण नेपाली कांग्रेसले भोलि आयोजना गर्ने भनिएको ‘महिला उद्यमशीलता सम्मेलन २०८३’ स्थगित गरेको छ।

नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानले भदौ ११ गते आयोजना गर्ने तय गरेको सम्मेलन देशभरको विपद् र असहज परिस्थितिलाई मध्यनजर गर्दै अर्को सूचना नभएसम्मका लागि स्थगित गरिएको जनाएको छ।

प्रतिष्ठानका अनुसार हालको अवस्थामा कार्यक्रम सञ्चालन गर्नु उपयुक्त नभएकाले सम्मेलन स्थगित गरिएको हो।

सम्मेलनमा सहभागी हुने महिला उद्यमी, वक्ता, अतिथि, प्रतिनिधि तथा सहयोगी संस्थालाई पर्न गएको असुविधाप्रति प्रतिष्ठानले क्षमायाचना गरेको छ। सम्मेलनको नयाँ मिति र कार्यक्रमसम्बन्धी जानकारी पछि सार्वजनिक गरिने जनाइएको छ।