काठमाडौं । रसुवामा आएको भीषण बाढीपछि प्रभावित तथा बेपत्ता नागरिकको खोजी र उद्धार कार्य तीव्र पारिएको छ। नेपाली सेना, नेपाल प्रहरी र सशस्त्र प्रहरी बलसँगै स्थानीय सर्वसाधारणसमेत उद्धार तथा खोजीमा खटिएका छन्।

बाढी प्रभावित क्षेत्रमा हेलिकप्टर र ड्रोनको प्रयोग गरी सम्भावित स्थानमा खोजी भइरहेको छ। उद्धार टोलीले नदी किनार, बाढीले पुरिएका क्षेत्र तथा जोखिमयुक्त स्थानमा बेपत्ता नागरिकको खोजी गरिरहेको छ।

सशस्त्र प्रहरी बलले रसुवागढी भन्सार यार्डसहित बाढी प्रभावित क्षेत्रमा पुरिएका तथा नदी किनारमा थुनिएका र हराइरहेका नागरिकको खोजीका लागि तालिमप्राप्त कुकुरसमेत परिचालन गरेको छ।

बाढीका कारण प्रभावित क्षेत्रमा उद्धार तथा खोजी कार्य चुनौतीपूर्ण बनेपछि आधुनिक उपकरण तथा तालिमप्राप्त जनशक्तिको प्रयोग बढाइएको हो। सुरक्षा निकायले सम्भावित जोखिमलाई ध्यानमा राख्दै खोजी तथा उद्धार कार्यलाई निरन्तरता दिइरहेका छन्।

बाढीबाट भएको मानवीय तथा भौतिक क्षतिको यकिन विवरण संकलन गर्ने कामसमेत भइरहेको जनाइएको छ।