धादिङ । रसुवाको भोटेकोशी नदीमा आएको बाढी त्रिशूली नदी हुँदै धादिङको मलेखु बजार आसपास पुगेपछि बाढी पूर्वानुमान महाशाखाले त्रिशूली नदी आसपासका बस्ती तथा बजार क्षेत्र खाली गर्न आग्रह गरेको छ।

भोटेकोशीको बाढी त्रिशूली नदी हुँदै तीव्र गतिमा तलतर्फ आइरहेको भन्दै महाशाखाले पृथ्वी राजमार्ग, मुग्लिन, नारायणगढलगायत त्रिशूली नदी आसपासका बस्ती तथा बजार क्षेत्रमा उच्च सतर्कता अपनाउन अनुरोध गरेको हो। महाशाखाका अनुसार बाढी अबको करिब आधा घण्टामा मुग्लिन क्षेत्र पार गर्ने क्रममा रहेकाले नदी किनार तथा तल्लो तटीय क्षेत्रमा जोखिम थप बढ्न सक्नेछ।

सम्भावित जोखिमलाई मध्यनजर गर्दै नदी आसपासका बस्ती तथा बजार क्षेत्र खाली गरी सुरक्षित स्थानमा जान महाशाखाले आग्रह गरेको छ। महाशाखाले त्रिशूली नदीको बहाव बढिरहेकाले नदी किनार र तल्लो तटीय क्षेत्रमा रहेका नागरिकलाई उच्च सतर्कता अपनाउन, जोखिमपूर्ण स्थानमा नबस्न र तत्काल सुरक्षित स्थानमा जान अनुरोध गरेको छ।

बाढीको सम्भावित जोखिमबाट जोगिन स्थानीय प्रशासन तथा सुरक्षा निकायको निर्देशन पालना गर्नसमेत महाशाखाले आग्रह गरेको छ।