बारा । जितपुरसिमरा उपमहानगरपालिकामा तीन दिनदेखि बेपत्ता रहेकी तीन वर्षीया बालिका मृत अवस्थामा फेला परेकी छन्।

जितपुरसिमरा उपमहानगरपालिका–१ की गरीमा चौधरी साउन ३१ गते बिहान करिब ८ बजे आफ्नै घरबाट हराएकी थिइन्। परिवारले खोजी गरिरहे पनि उनको अवस्था पत्ता लाग्न सकेको थिएन।

आइतबार साँझ बालिकाको घरभन्दा करिब ५० मिटर टाढा रहेको छिमेकीको घरभित्र शव फेला परेको जिल्ला प्रहरी कार्यालय बाराले जनाएको छ।

शव फेला परेको समयमा उक्त घरमा कोही पनि नरहेको प्रहरीले जनाएको छ। घटनाबारे जानकारी पाएलगत्तै तालिमप्राप्त कुकुरसहित प्रहरी टोली घटनास्थलमा पुगेर अनुसन्धान अघि बढाएको छ।

प्रहरीले बालिकाको हत्या गरी शव लुकाइएको हुन सक्ने आशंका गरेको छ। घटनाको वास्तविक कारण र संलग्न व्यक्तिबारे अनुसन्धान भइरहेको जिल्ला प्रहरी कार्यालय बाराका प्रहरी प्रवक्ता निलप्रसाद घलेले जानकारी दिए।