काठमाडौं । नेपाली कांग्रेसको १५औँ महाधिवेशनअन्तर्गत तल्ला तहका अधिवेशनको संशोधित कार्यतालिका सार्वजनिक भएको छ। केन्द्रीय निर्वाचन समितिले मंगलबार नयाँ कार्यतालिका प्रकाशन गरेको हो।

नयाँ तालिकाअनुसार गाउँ तथा नगर वडा अधिवेशन भदौ २४ गते हुनेछ। त्यसपछि गाउँ तथा नगर अधिवेशन भदौ २७ गते र प्रदेशसभा क्षेत्रीय अधिवेशन भदौ ३१ गते हुनेछ। प्रतिनिधिसभा क्षेत्रीय अधिवेशन असोज ३ गते, जिल्ला अधिवेशन असोज ७ गते र प्रदेश अधिवेशन असोज १० गते गर्ने तय भएको छ। कांग्रेसको १५औँ केन्द्रीय महाधिवेशन भने असोज १६ देखि १९ गतेसम्म हुने कार्यतालिका यथावत् राखिएको छ। यसअघि केन्द्रीय समितिले तय गरेको महाधिवेशनको मूल मिति परिवर्तन नगरी निर्वाचन समितिले तल्ला तहका अधिवेशनको मिति मात्रै हेरफेर गरेको हो।

संशोधित कार्यतालिकासँगै कांग्रेसको महाधिवेशन प्रक्रिया वडा तहबाट सुरु भएर क्रमशः गाउँ–नगर, क्षेत्र, जिल्ला र प्रदेश हुँदै केन्द्रीय महाधिवेशनतर्फ अघि बढ्नेछ।