काभ्रे । काभ्रेको खानिखोला गाउँपालिका–४ स्याउरीथलीमा भएको सवारी दुर्घटनामा दुई जनाको मृत्यु भएको छ भने चार जना घाइते भएका छन्।

दुर्घटनामा खानिखोला गाउँपालिका–४ का कमल बहादुर माझी र खानिखोला–२ की अनिता मोक्तानको मृत्यु भएको हो। अनिता मोक्तानको माइतीघर बनेपा–साँगा रहेको जनाइएको छ। दुर्घटनामा रावल तामाङ (बनेपा–साँगा), प्रदीप जर्गामगर (खानीखोला–३), बौद्ध लामा (खानीखोला–५, डुम्रे) र धनपति रावल (सुकुटे, साँगाचोक) घाइते भएका छन्। घाइतेमध्ये धनपति रावलको अवस्था केही गम्भीर रहेको बताइएको छ।

दुर्घटनामा मृत्यु र घाइते भएकाहरूको विवरण खानीखोला गाउँपालिका–१ का वडाध्यक्ष सन्तमान थिङले पुष्टि गरेको स्रोतले जनाएको छ। दुर्घटनाको कारण र घटनाको थप विवरणबारे प्रहरीले अनुसन्धान गरिरहेको छ।