बुटवल । नेकपा एमाले नेतृत्वको लुम्बिनी प्रदेश सरकारलाई जनता समाजवादी पार्टी (जसपा) नेपालले दिएको समर्थन फिर्ता लिएपछि मुख्यमन्त्री चेतनारायण आचार्य सरकारमाथि राजनीतिक दबाब बढेको छ।

जसपा नेपालका महासचिव डा. सुरेन्द्रकुमार झाले सोमबार प्रदेशसभा संसदीय दलका नेता सन्तोषकुमार पाण्डेयसहित सदस्यहरूलाई पत्र पठाउँदै आचार्य नेतृत्वको सरकारलाई दिएको समर्थन तत्कालै फिर्ता लिन निर्देशन दिएका हुन्।

जसपाले मुख्यमन्त्री आचार्यले प्रदेशसभाबाट लिन लागेको विश्वासको मतको विपक्षमा मतदान गर्नसमेत आफ्ना सांसदहरूलाई निर्देशन दिएको छ।

जसपाले समर्थन फिर्ता लिएसँगै लुम्बिनी प्रदेशको सत्ता समीकरण थप पेचिलो बनेको छ। यसअघि सरकारलाई समर्थन गरेका दलहरूबीचको समीकरणमा आएको परिवर्तनले मुख्यमन्त्री आचार्यलाई विश्वासको मत जुटाउन चुनौती थपिएको छ।

जसपाको निर्णयले प्रदेश सरकारको स्थायित्वमाथि समेत प्रश्न उठाएको छ। अब मुख्यमन्त्री आचार्यले प्रदेशसभामा विश्वासको मत लिँदा कुन–कुन दलको साथ पाउँछन् भन्ने विषयले लुम्बिनीको आगामी राजनीतिक समीकरण निर्धारण गर्ने देखिएको छ।

जसपाले भने सरकारलाई दिएको समर्थन फिर्ता लिनुको कारणबारे विस्तृत राजनीतिक धारणा सार्वजनिक गरिसकेको छैन। तर, समर्थन फिर्ता र विश्वासको मतको विपक्षमा मतदान गर्ने निर्णयसँगै लुम्बिनी प्रदेशको सत्ता राजनीतिमा नयाँ तरंग पैदा भएको छ।