काठमाडौं । इन्डोनेसियाको पूर्वी क्षेत्रमा शनिबार बिहान ७.७ म्याग्निच्युडको शक्तिशाली भूकम्प गएको छ। भूकम्प र पराकम्पका कारण कम्तीमा पाँच जनाको मृत्यु भएको प्रान्तीय गभर्नरले बताएका छन्।

भूकम्पपछि केही क्षेत्रमा एक मिटरभन्दा कम उचाइका सुनामी लहरसमेत देखिएका थिए। करिब तीन घण्टापछि सुनामी चेतावनी हटाइएको थियो।भूकम्पका कारण घर, सरकारी भवन तथा अन्य संरचनामा क्षति पुगेको छ। नागेकेओ क्षेत्रका करिब २ हजार मानिसलाई सुरक्षित स्थानमा सारिएको छ भने केही क्षेत्रमा सडक र विद्युत् सेवा अवरुद्ध भएको छ।

भूकम्पपछि अस्पतालबाट बिरामीलाई बाहिर सारिएको र केही क्षेत्रमा पहिरो गएको समेत जनाइएको छ।

इन्डोनेसिया ‘प्यासिफिक रिङ अफ फायर’ क्षेत्रमा पर्ने भएकाले यहाँ भूकम्प र ज्वालामुखीका घटना बारम्बार हुने गर्छन्।