काठमाडौं । सर्वोच्च अदालतले वरिष्ठ पत्रकार तथा जनआस्था साप्ताहिकका प्रधान सम्पादक किशोर श्रेष्ठलाई प्रहरीले बरामद गरेका सामानसहित भदौ १ गते अदालतमा उपस्थित गराउन आदेश दिएको छ।

श्रेष्ठकी पत्नी सरस्वती श्रेष्ठले दायर गरेको बन्दी प्रत्यक्षीकरण रिटमाथि सुनुवाइ गर्दै सर्वोच्च अदालतका न्यायाधीश बालकृष्ण ढकालको इजलासले श्रेष्ठलाई अदालतमा उपस्थित गराउँदा उनको निवास तथा जनआस्था कार्यालयबाट प्रहरीले बरामद गरेका सामानसमेत पेश गर्न आदेश दिएको हो। श्रेष्ठलाई व्यक्तिगत गोपनीयतासम्बन्धी कसुरमा पक्राउ गरिएको हो। उनको पक्राउलाई लिएर प्रेस तथा पत्रकारसम्बद्ध संघसंस्थाले आपत्ति जनाउँदै आएका छन्। बन्दी प्रत्यक्षीकरण रिटको पक्षमा वरिष्ठ अधिवक्ता टीकाराम भट्टराई र रमेश बडालले बहस गरेका थिए।

अब भदौ १ गते श्रेष्ठसँगै प्रहरीले बरामद गरेका सामानसमेत अदालतमा पेश गरिने भएको छ।