काठमाडौं । वरिष्ठ पत्रकार तथा जनआस्था साप्ताहिकका प्रधान सम्पादक किशोर श्रेष्ठलाई थुनामुक्त गर्न माग गर्दै दायर गरिएको बन्दी प्रत्यक्षीकरण रिटमाथि आज सर्वोच्च अदालतमा सुनुवाइ हुँदैछ।

श्रेष्ठकी पत्नी सरस्वती श्रेष्ठले श्रेष्ठलाई बिनाआधार र कारण पक्राउ गरी गैरकानुनी रूपमा थुनामा राखिएको दाबी गर्दै थुनामुक्त गर्न मागसहित रिट दायर गरेकी हुन्। उक्त रिट सर्वोच्च अदालतका न्यायाधीश बालकृष्ण ढकालको इजलासमा पेशीमा चढेको छ।

दीपिका सिंहको जाहेरीका आधारमा व्यक्तिगत गोपनीयतासम्बन्धी कसुरमा बुधबार राति पक्राउ परेका श्रेष्ठलाई हिजो अदालतले तीन दिनको म्याद थप गरेको थियो। श्रेष्ठको पक्राउसँगै पत्रकार तथा सञ्चारसम्बद्ध संघसंस्थाले घटनाप्रति आपत्ति जनाउँदै प्रेस तथा अभिव्यक्ति स्वतन्त्रताको सम्मान गर्न माग गरेका छन्।