काठमाडौं । ७० लाख रुपैयाँको जग्गा कारोबारलाई वैध देखाउन सरकारी अभिलेखमै हेरफेर गरेको आरोपमा नेपालगन्जका वडाध्यक्षसहित चार जनाविरुद्ध भ्रष्टाचार मुद्दा दायर भएको छ।

नेपालगन्ज–२० का वडाध्यक्ष कौशलकुमार धोवी, वडा सचिव वीरबहादुर थापामगर, रविन्द्र लामिछाने र विकासकुमार चापागाईविरुद्ध अख्तियार दुरुपयोग अनुसन्धान आयोगले विशेष अदालतमा आरोपपत्र दायर गरेको हो।

अख्तियारका अनुसार जग्गा कारोबार पुष्टि गर्ने उद्देश्यले नक्कली करारनामा तयार गरी वडा कार्यालयको लिखत प्रमाणित दर्ता किताबमा पछि गएर विवरण थपघट गरिएको थियो।

सरकारी छापसमेत दुरुपयोग गरी चलानी नम्बर र कागजातमा हेरफेर गरेको आरोप छ।

वडाध्यक्ष र वडा सचिवविरुद्ध सरकारी कागजात सच्याएको अभियोग लगाइएको छ भने लामिछाने र चापागाईलाई मतियारको आरोप लगाइएको छ।

आयोगले चारै जनामाथि भ्रष्टाचार निवारण ऐनअनुसार कैद तथा जरिवानाको मागदाबी गरेको छ।