काठमाडौं । पोखरा अन्तर्राष्ट्रिय विमानस्थल निर्माणसँग जोडिएको भ्रष्टाचार मुद्दामा पूर्वअर्थमन्त्री ज्ञानेन्द्रबहादुर कार्कीलाई तत्काल जेल जानुपर्ने अवस्था टरेको छ। विशेष अदालतले कार्कीलाई १५ लाख रुपैयाँ धरौटी वा बैंक जमानत लिएर तारेखमा राख्ने आदेश दिएको हो।

कार्कीविरुद्ध अख्तियार दुरुपयोग अनुसन्धान आयोगले ३ अर्ब ६२ करोड रुपैयाँभन्दा बढी बिगो मागदाबी गर्दै मुद्दा दायर गरेको थियो। अख्तियारले विमानस्थल निर्माणका क्रममा ठेकेदार कम्पनीलाई भ्याटलगायतका महसुलमा उन्मुक्ति दिने व्यवस्था कार्यान्वयन सम्झौतामा राख्दा राज्यलाई ठूलो आर्थिक क्षति पुगेको दाबी गरेको छ।

तर कार्कीले आरोप अस्वीकार गर्दै आफूले नेपाल–चीनबीच भएको ऋण सम्झौता कार्यान्वयन मात्रै गरेको अदालतमा जिकिर गरेका छन्। अदालतले तत्काल उपलब्ध प्रमाण र परिस्थितिका आधारमा उनलाई थुनामै राखेर मुद्दा अघि बढाउन आवश्यक नदेखिएको जनाएको छ।