काठमाडौं । लगातारको वर्षासँगै आएको बाढी, पहिरो र सडक कटानले देशभरका प्रमुख राजमार्गको यातायात प्रभावित बनेको छ। विभिन्न जिल्लामा सडक अवरुद्ध हुँदा यात्रु तथा मालवाहक सवारीसाधन समस्यामा परेका छन्।

प्रहरीका अनुसार तेह्रथुम, सिन्धुपाल्चोक, इलाम, रसुवा र रुकुम पश्चिमलगायत जिल्लाका महत्वपूर्ण सडकखण्डमा यातायात सञ्चालन हुन सकेको छैन। सिन्धुपाल्चोकमा पहिरो र सडक भासिँदा अरनिको राजमार्गका जिरोकिलो, कोदारी, लिपिङ तथा डुम्रे क्षेत्र प्रभावित भएका छन्। सडक अवरुद्ध भएपछि चीनतर्फ जाने तथा स्थानीय यातायातसमेत प्रभावित भएको छ। इलामको राजदुवालीमा मेची राजमार्ग हिलाम्मे भएपछि सडक पूर्ण रूपमा बन्द भएको छ। यता रसुवाको खाल्टे क्षेत्रमा सडक कटान भएपछि त्रिशूली–मैलुङ–स्याफ्रुबेँसी सडक पनि ठप्प छ।

रुकुम पश्चिमको रिजेगार्ड खोलामा पहिरो खस्दा जाजरकोट–डोल्पा सडकखण्ड अवरुद्ध भएको छ। तेह्रथुमको पिङवाखोलानजिक पहिरो गएपछि मध्यपहाडी लोकमार्गमा समेत यातायात रोकिएको प्रहरीले जनाएको छ। यसैबीच, सम्भावित बाढीको जोखिमलाई ध्यान दिँदै बीपी राजमार्गको खुर्कोट–नेपालथोक–कटुन्जेबेँसी खण्डमा राति ६ बजेदेखि बिहान ४ बजेसम्म सवारी सञ्चालनमा रोक लगाइएको छ। कान्ति लोकपथमा पनि राति ५ बजेदेखि बिहान ५ बजेसम्म यातायात बन्द गरिएको छ।

वर्षा अझै जारी रहेकाले सडक अवरोध थप बढ्न सक्ने भन्दै प्रहरीले यात्रुलाई सडकको अवस्था बुझेर मात्र यात्रा गर्न आग्रह गरेको छ।