भक्तपुर । उपभोक्ताको बाध्यताको फाइदा उठाउँदै खाना पकाउने एलपी ग्यास चर्को मूल्यमा बिक्री गरेको आरोपमा भक्तपुरबाट एक जना पक्राउ परेका छन्।

चाँगुनारायण नगरपालिका–२, दुवाकोट बारुदखाना चोकमा भाडामा बस्दै आएका ५७ वर्षीय तुलसीराम त्वयनालाई प्रहरीले पक्राउ गरेको हो। प्रहरीका अनुसार त्वयनाले उपभोक्तालाई प्रतिसिलिन्डर ७ हजार रुपैयाँमा एलपी ग्यास बिक्री गरिरहेको सूचना पाएपछि अनुगमन गरिएको थियो। अनुगमनका क्रममा उनको साथबाट ३ थान ग्यास सिलिन्डर नियन्त्रणमा लिइएको जिल्ला प्रहरी परिसर भक्तपुरले जनाएको छ।

सामान्य अवस्थामा बिक्री हुने ग्यासमा कृत्रिम अभाव सिर्जना गरी मनपरी मूल्य असुल्ने गतिविधिलाई कालोबजारीका रूपमा लिइएको प्रहरीले जनाएको छ।

पक्राउ परेका त्वयनामाथि थप अनुसन्धान भइरहेको जिल्ला प्रहरी परिसर भक्तपुरले जनाएको छ।