काठमाडौं । नेपाली कांग्रेसका नेता शशांक कोइरालाले पूर्वसभापति शेरबहादुर देउवा स्वदेश फर्किने क्रममा प्रहरीले धरपकड गरे कांग्रेस प्रतिरोधमा उत्रिने चेतावनी दिएका छन्।

शुक्रबार चुनदेवीमा नेपाली कांग्रेस राष्ट्रिय भेला आयोजक समितिले आयोजना गरेको पत्रकार सम्मेलनमा बोल्दै कोइरालाले देउवामाथि कुनै पनि प्रकारको पक्राउ वा धरपकडको प्रयास स्वीकार्य नहुने बताए।

उनले साउन २६ गते नेपाल फर्किने तयारीमा रहेका देउवालाई लक्षित गरी धरपकड हुन सक्ने आशंका व्यक्त गर्दै त्यसो भए पार्टीले कडा विरोध गर्ने बताए।

कोइरालाका अनुसार देउवा साउन २९ गते संस्थापन इतर पक्षले आयोजना गर्ने भेलालाई सम्बोधन गर्ने कार्यक्रम रहेको छ। उक्त भेलामार्फत पार्टीको समसामयिक राजनीतिक अवस्था तथा आगामी रणनीतिबारे धारणा सार्वजनिक गरिने जनाइएको छ।

पछिल्लो समय कांग्रेसभित्र देखिएको आन्तरिक विवाद र राजनीतिक गतिविधिका बीच देउवाको स्वदेश आगमनलाई विशेष महत्वका साथ हेरिएको छ।