काठमाडौं । नेपाल रेडक्रस सोसाइटी केन्द्रीय कार्यालयले ६२ वटा जिल्ला शाखालाई लामो समयदेखि बाँकी रहेको बक्यौता रकम २१ दिनभित्र केन्द्रीय खातामा जम्मा गर्न निर्देशन दिएको छ।

महामन्त्री ऋषिरमण खनालले सम्बन्धित जिल्ला शाखाहरूलाई पत्राचार गर्दै तोकिएको समयभित्र अनिवार्य रूपमा बक्यौता रकम केन्द्रीय कार्यालयको बैंक खातामा जम्मा गरी भौचर वा अन्य प्रमाणसमेत पठाउन आग्रह गरेका छन्।

केन्द्रीय कार्यालयका अनुसार विभिन्न निकायबाट भएका अध्ययन, छानबिन तथा समाज कल्याण परिषद्को सुझावका आधारमा बक्यौता असुली प्रक्रिया अघि बढाइएको हो। ती ६२ जिल्ला शाखामा ब्लड ब्याग, किटलगायत विभिन्न शीर्षकमा करिब २५ वर्षदेखिको झण्डै २ करोड रुपैयाँ बक्यौता रहेको जनाइएको छ।

महामन्त्री खनालले तोकिएको समयसीमाभित्र रकम दाखिला नगरे प्रचलित ऐन, कानुन तथा संस्थाको विधानबमोजिम आवश्यक कारबाही प्रक्रिया अघि बढाइने चेतावनी दिएका छन्।

नेपाल रेडक्रस सोसाइटीभित्र लामो समयदेखि आर्थिक अनियमितता र बेरुजुसम्बन्धी प्रश्न उठिरहेका बेला नयाँ नेतृत्वले थालेको यो कदमले केन्द्र र जिल्ला शाखाबीचको आर्थिक अनुशासन तथा वित्तीय प्रणालीलाई थप व्यवस्थित बनाउन सहयोग पुग्ने अपेक्षा गरिएको छ।