काठमाडौं । रामेछाप, सिन्धुली र ओखलढुङ्गाको सिमाना नजिक लिखु खोलाको क्षेत्रमा भएको सवारी दुर्घटनामा सुनकोशी नदीमा खसेको कारमा चार जना सवार रहेको खुलेको छ।

प्रहरीका अनुसार सडकमा रोकिएको कारलाई बसले ठक्कर दिँदा कार सुनकोशी नदीमा खसेको हो। कारका धनी मध्यपहाडी (पुष्पलाल) लोकमार्ग आयोजनासँग सम्बन्धित ठेकेदार तिलकुमार लामा रहेको र उनीसहित चार जना कारमा सवार रहेको प्रहरीले जनाएको छ।

घटनालगत्तै प्रहरी, स्थानीय जनप्रतिनिधि र स्थानीयवासी उद्धारका लागि घटनास्थलमा पुगेका छन्। तर सुनकोशीमा आएको तीव्र भेल र नदीको बहावका कारण उद्धार कार्यमा कठिनाइ भइरहेको छ।

प्रहरीका अनुसार समाचार तयार पार्दासम्म कारभित्र रहेका यात्रुहरू बाहिर निस्कन सकेका छैनन्। उद्धार टोलीले जोखिमका बीच उद्धार प्रयासलाई निरन्तरता दिएको छ भने घटनाबारे थप विवरण आउन बाँकी रहेको प्रहरीले जनाएको छ।