काठमाडौं। नेपाल प्रहरीका प्रहरी महानिरीक्षक (आईजीपी) दानबहादुर कार्कीले पूर्वी तराईका केही स्थानमा देखिएको धार्मिक सद्भाव बिथोल्ने र सर्वसाधारणमा डर तथा त्रास फैलाउने गतिविधिप्रति गम्भीर चिन्ता व्यक्त गरेका छन्।

आईजीपी कार्कीले सामाजिक सञ्जालमार्फत अफवाह फैलाउने, उत्तेजक अभिव्यक्ति दिने तथा कानुनविपरीतका गतिविधिमा संलग्न नहुन सबैलाई आग्रह गरेका छन्। उनका अनुसार यस्ता कार्यले सामाजिक एकता कमजोर पार्ने, अविश्वास बढाउने र समाजलाई विभाजनतर्फ धकेल्ने खतरा हुन्छ।

संवेदनशील परिस्थितिमा अफवाह र घृणाभन्दा विवेक, संयमता तथा सद्भावलाई प्राथमिकता दिनुपर्नेमा उनले जोड दिएका छन्। साथै, एकअर्काको धर्म, आस्था, संस्कृति र मर्यादाको सम्मान गर्नु सबै नागरिकको साझा जिम्मेवारी भएको उल्लेख गरेका छन्।

‘हाम्रो धर्म, संस्कार र संस्कृति फरक हुन सक्छन्। मुलुक एउटै हो र हाम्रो भावना पनि एउटै छ,’ आईजीपी कार्कीले अपिलमा भनेका छन्।

उनले वर्तमान संवेदनशील अवस्थामा संयमता, सहिष्णुता र आपसी सम्मानका साथ सामाजिक सद्भाव, राष्ट्रिय एकता तथा भाइचारा कायम राख्न सम्पूर्ण नेपालीलाई आग्रह गरेका छन्।