सिरहा। सिरहामा दुई समुदायबीच भएको झडपपछि अवस्था तनावपूर्ण बनेको छ। स्थिति नियन्त्रणमा लिन स्थानीय प्रशासनले कर्फ्यु आदेश जारी गरे पनि प्रदर्शन र हिंसात्मक गतिविधि नरोकिएपछि प्रहरीले गोली चलाएको छ।

प्रदर्शनका क्रममा गम्भीर घाइते भएका दुई जनामध्ये एक जनालाई थप उपचारका लागि धरान रिफर गरिएको प्रहरीले जनाएको छ।

कर्फ्यु उल्लंघन गर्दै प्रदर्शनकारीहरूले एक मोटरसाइकल ग्यारेजमा आगजनी गरेका छन्। आगलागीबाट ११ वटा मोटरसाइकल पूर्ण रूपमा नष्ट भएको प्रहरीले पुष्टि गरेको छ।

सुनसरीमा दुई समुदायबीच भएको झडपको प्रभाव सिरहासम्म फैलिएको बताइएको छ। त्यसपछि सिरहामा पनि दुई पक्षबीच तनाव बढ्दै गएर झडप भएको हो।

स्थिति नियन्त्रणमा लिन सुरक्षा निकाय परिचालन गरिएको छ। प्रशासनले सर्वसाधारणलाई कर्फ्यु आदेशको पूर्ण पालना गर्न तथा अफवाहमा विश्वास नगर्न आग्रह गरेको छ। जिल्लाको सुरक्षा अवस्था थप संवेदनशील रहेकाले सुरक्षा सतर्कता बढाइएको प्रहरीले जनाएको छ।