रुपन्देही । नेकपा एमाले र नेकपाबीच सत्ता सहकार्यका लागि सहमति बनेसँगै लुम्बिनी प्रदेश सरकारबाट नेपाली कांग्रेस बाहिरिने भएको छ। कांग्रेसले आजै सरकारलाई दिएको समर्थन फिर्ता लिँदै आफ्ना मन्त्रीहरूबाट राजीनामा गराउने तयारी गरेको छ।

कांग्रेसबाट लुम्बिनी प्रदेश सरकारमा सहरी विकास तथा खानेपानी मन्त्री सरोज थापा (रोज राणा), आर्थिक मामिला तथा योजना मन्त्री धनेन्द्र कार्की, उद्योग, पर्यटन तथा यातायात मन्त्री प्रचण्डविक्रम न्यौपाने, सामाजिक विकास मन्त्री जन्मजय तिमिल्सिना र वन तथा वातावरण मन्त्री देवकरणप्रसाद कलवार सहभागी छन्।

सहरी विकास तथा खानेपानी मन्त्री राणाले आजै मन्त्री पदबाट राजीनामा दिने र कांग्रेसले सरकारलाई दिएको समर्थनसमेत फिर्ता लिने बताए।

‘आजै मार्ग प्रशस्त गर्छौँ। समर्थन पनि फिर्ता हुन्छ। अब हामी प्रतिपक्षमा बस्ने हो,’ उनले भने। एमाले–नेकपाबीचको सहमतिपछि लुम्बिनी प्रदेशको सत्ता समीकरणमा फेरबदल आउने भएको छ। कांग्रेस सरकारबाट बाहिरिएसँगै प्रदेश सरकार नयाँ राजनीतिक समीकरणअनुसार अघि बढ्ने देखिएको छ।