काभ्रे । सामाजिक सुरक्षा भत्ता लिएर घर फर्कंदै गरेका एक वृद्धको रोशी खोलाले बगाउँदा मृत्यु भएको छ।

मृत्यु हुनेमा काभ्रेपलाञ्चोकको रोशी गाउँपालिका–७ निवासी ७५ वर्षीय बुद्धिमान तामाङ रहेका छन्। उनी कटुञ्जेबाट सामाजिक सुरक्षा भत्ता लिएर घर फर्कने क्रममा रोशी खोलाको तीव्र बहावमा बगेका थिए।

घटनापछि स्थानीयवासी र सुरक्षाकर्मीले खोजी अभियान सञ्चालन गरेका थिए। भकुण्डेबेसीस्थित सशस्त्र प्रहरी बलको विपद् प्रतिकार्य टोलीले खोजीका क्रममा रोशी गाउँपालिका-८ गिम्दीबेसी क्षेत्रमा तामाङको शव फेला पारेको जनाएको छ।

लगातारको वर्षासँगै नदी तथा खोलामा पानीको बहाव बढिरहेका बेला भएको यस घटनाले स्थानीयवासीलाई स्तब्ध बनाएको छ। घटनाबारे सम्बन्धित निकायले थप अनुसन्धान गरिरहेको जनाएको छ।