सुर्खेत । कर्णाली प्रदेशका मुख्यमन्त्री यामलाल कँडेलविरुद्ध अविश्वासको प्रस्ताव दर्ता भएको छ। नेपाली कांग्रेस संसदीय दलको निर्णयअनुसार बिहीबार प्रदेशसभा सचिवालयमा अविश्वासको प्रस्ताव दर्ता गरिएको हो।

नेपाली कांग्रेस संसदीय दलका प्रमुख सचेतक हिक्मत विष्टका अनुसार प्रस्तावमा कांग्रेसका १६ जना प्रदेशसभा सदस्यले हस्ताक्षर गरेका छन्। प्रदेश सरकारको नेतृत्व गरिरहेका मुख्यमन्त्री कँडेलविरुद्ध कांग्रेसले औपचारिक रूपमा अविश्वास प्रस्ताव दर्ता गरेसँगै कर्णालीको राजनीतिक समीकरण फेरि तरंगित बनेको छ।

अब प्रदेशसभा नियमावलीअनुसार अविश्वास प्रस्तावमाथि आवश्यक प्रक्रिया अघि बढाइनेछ। प्रस्तावमाथिको छलफल र मतदानपछि मुख्यमन्त्री कँडेलको सरकारको भविष्य टुंगो लाग्नेछ।

यस घटनाक्रमसँगै कर्णाली प्रदेशको सत्ता राजनीतिले नयाँ मोड लिएको छ भने आगामी दिनमा दलहरूको रणनीति र समर्थन–विरोधको समीकरणले सरकारको निरन्तरतामा निर्णायक भूमिका खेल्ने देखिएको छ।