जनकपुरधाम । केन्द्रमा कांग्रेस-एमाले सम्बन्धलाई लिएर राजनीतिक उतारचढाव भइरहेका बेला मधेश प्रदेशमा भने सत्ता गठबन्धन यथावत् रहने भएको छ। सत्ता साझेदार दलहरूले प्रदेश सरकार परिवर्तन नगर्ने र कांग्रेस नेतृत्वकै सरकारलाई निरन्तरता दिने सहमति गरेका छन्।

मुख्यमन्त्री कृष्णप्रसाद यादव नेतृत्वको सरकारलाई निरन्तरता दिने विषयमा कांग्रेस, नेकपा (एमाले) र नेकपा (एकीकृत समाजवादी) का प्रदेशस्तरीय नेताबीच छलफल भएको हो। छलफलपछि प्रदेशमा हालको गठबन्धनलाई निरन्तरता दिने निष्कर्ष निकालिएको नेताहरूले बताएका छन्।

एमाले संसदीय दलका नेता सरोजकुमार यादवले प्रदेशको राजनीतिक अवस्था स्थिर रहेको उल्लेख गर्दै केन्द्रको राजनीतिक समीकरणले तत्काल मधेश सरकारलाई असर नगर्ने बताए। उनका अनुसार गठबन्धनमा सहभागी तीन दलबीच सरकार सञ्चालनका विषयमा कुनै मतभेद छैन।

यसअघि अन्य प्रदेशमा कांग्रेस–एमाले सहकार्य टुट्ने चर्चा चुलिँदै जाँदा मधेश प्रदेश सरकार पनि परिवर्तन हुन सक्ने अनुमान गरिएको थियो। तर सत्ता साझेदार दलहरूले प्रदेशको परिस्थिति फरक रहेको भन्दै निर्वाचनसम्म सहकार्य कायम राख्ने समझदारी गरेका छन्।

यससँगै तत्कालका लागि मधेश प्रदेशमा सरकार परिवर्तनको सम्भावना टरेको छ भने मुख्यमन्त्री कृष्णप्रसाद यादव नेतृत्वको सरकारले निरन्तरता पाउने निश्चित भएको छ।