काठमाडौं । स्वास्थ्य तथा खाद्य स्वच्छता मन्त्रालयले स्वीकृत बिदा नलिई लगातार ६० दिनसम्म कार्यालयमा अनुपस्थित रहेका २३ जना स्वास्थ्यकर्मीलाई स्पष्टीकरण सोध्दै कारबाही प्रक्रिया अघि बढाएको छ।

मन्त्रालयले सार्वजनिक सूचनामार्फत सम्बन्धित कर्मचारीहरूलाई सूचना प्रकाशित भएको मितिले १५ दिनभित्र लिखित सफाइ पेश गर्न निर्देशन दिएको हो। तोकिएको समयभित्र चित्तबुझ्दो जवाफ नआए उनीहरूलाई स्वास्थ्य सेवाबाट हटाउने विभागीय कारबाही गरिने चेतावनी दिइएको छ।

नेपाल स्वास्थ्य सेवा ऐन, २०५३ अनुसार स्वीकृत बिदाबिना लगातार ६० दिनसम्म अनुपस्थित रहनु गम्भीर अनुशासनहीनता मानिने भएकाले विभागीय कारबाही प्रक्रिया सुरु गरिएको मन्त्रालयले जनाएको छ।

कारबाहीको सूचीमा रहेका कर्मचारीहरू कान्ति बाल अस्पताल, वीर अस्पताल, शुक्रराज ट्रपिकल तथा सरुवा रोग अस्पताल, राष्ट्रिय क्षयरोग नियन्त्रण केन्द्र भक्तपुर तथा आयुर्वेद चिकित्सालय नरदेवीलगायत विभिन्न सरकारी स्वास्थ्य संस्थामा कार्यरत छन्।

मन्त्रालयले सम्बन्धित कर्मचारीसँग सेवाबाट हटाउनु नपर्ने कुनै कानुनी वा व्यावहारिक आधार भए १५ दिनभित्र प्रमाणसहित सफाइ पेश गर्न आग्रह गरेको छ। अन्यथा प्रचलित कानुनबमोजिम उनीहरूलाई सेवाबाट हटाउने निर्णय गरिने मन्त्रालयको सूचनामा उल्लेख छ।