काठमाडौं । अस्थायी र करारका कर्मचारी हटाउने सरकारको तयारीविरुद्ध आन्दोलन चर्किएको छ। सेवा निरन्तरताको माग गर्दै देशभरका अस्थायी तथा करार कर्मचारीहरूले मंगलबार अर्थ मन्त्रालयको मूल प्रवेशद्वारमा धर्ना दिँदै सरकारविरुद्ध नाराबाजी गरेका छन्।

खर्च कटौतीको नाममा वर्षौंदेखि सरकारी निकायमा काम गर्दै आएका कर्मचारीलाई हटाएर आउटसोर्सिङ प्रणाली लागू गर्न खोजिएको भन्दै उनीहरूले सरकारको निर्णयको कडा विरोध गरेका हुन्।

प्रदर्शनमा सहभागी कर्मचारीहरूले सरकारले आफ्नै संस्थामा काम गरिरहेका जनशक्तिलाई विस्थापित गरेर निजी कम्पनीमार्फत काम गराउने नीति कर्मचारीमाथिको अन्याय भएको बताएका छन्। उनीहरूले तत्काल सेवा निरन्तरताको सुनिश्चितता गर्न सरकारसँग माग गरेका छन्।

कर्मचारीहरूले सरकारले आफ्ना माग बेवास्ता गरे आन्दोलन थप सशक्त बनाउने चेतावनी दिएका छन्। अहिले विभिन्न मन्त्रालयमा कार्यरत अस्थायी र करार कर्मचारीहरू संयुक्त रूपमा आन्दोलनमा उत्रिएका छन्।

सरकारको कर्मचारी व्यवस्थापन र खर्च कटौतीको नीति कार्यान्वयनको तयारीसँगै आन्दोलनले थप तीव्रता लिने संकेत देखिएको छ।