काठमाडौं । गृहमन्त्री रमेश लेखक गुरुङले सुकुम्बासी तथा भूमिहीन नागरिकको समस्या समाधान सरकारको उच्च प्राथमिकतामा रहेको बताएका छन्।

भक्तपुरको खरिपाटीस्थित नेपाल विद्युत् प्राधिकरणको तालिम केन्द्रमा अस्थायी रूपमा बसोबास गरिरहेका सुकुम्बासी परिवारसँग छलफल गर्दै गृहमन्त्री गुरुङले सुकुम्बासी समस्याको दीर्घकालीन समाधानका लागि सरकार गम्भीरतापूर्वक अघि बढिरहेको बताए।

उनले प्रभावित नागरिकको साथ, सहयोग र विश्वासबिना समस्या समाधान सम्भव नहुने उल्लेख गर्दै सरकारसँग सहकार्य गर्न आग्रह गरे।

“तपाईंहरूको समस्या हाम्रो पनि समस्या हो। सरकारले यसलाई गम्भीर रूपमा बुझेको छ। समाधानका लागि यहाँहरूको पनि सकारात्मक सहयोग आवश्यक छ,” उनले भने।

गृहमन्त्री गुरुङले सुकुम्बासी तथा भूमिहीन नागरिकको विषयलाई राजनीतिक स्वार्थसँग जोडेर हेर्न नहुने धारणा राख्दै सबै सरोकारवालालाई जिम्मेवार र संयमित भूमिका निर्वाह गर्न आग्रह गरे।

उनका अनुसार सरकारले दीर्घकालीन, न्यायोचित र कानुनी आधारमा समस्या समाधान गर्ने उद्देश्यका साथ आवश्यक पहल गरिरहेको छ।