काठमाडौं । चर्चित अभिनेत्री तथा निर्देशक दीपाश्री निरौलाको ब्रेन ट्युमरको सफल शल्यक्रिया गरिएको छ। उनी हाल काठमाडौंस्थित अन्नपूर्ण न्यूरो अस्पतालमा उपचाररत रहेकी छन्।

पारिवारिक स्रोतका अनुसार मंगलबार गरिएको शल्यक्रिया सफल भएको छ। शल्यक्रियापछि उनको स्वास्थ्य अवस्था सुधारोन्मुख रहेको र चिकित्सकको निगरानीमा उपचार जारी रहेको बताइएको छ।

करिब डेढ साताअघि ढाड दुख्ने समस्या देखिएपछि दीपाश्री अस्पताल पुगेकी थिइन्। प्रारम्भिक परीक्षणपछि चिकित्सकले थप स्वास्थ्य परीक्षण गरेका थिए। विस्तृत परीक्षणका क्रममा उनको मस्तिष्कमा ट्युमर रहेको पुष्टि भएपछि शल्यक्रिया गरिएको हो।

हाल उनको स्वास्थ्यमा क्रमिक सुधार भइरहेको पारिवारिक स्रोतले जनाएको छ। अस्पतालले भने यस विषयमा औपचारिक स्वास्थ्य बुलेटिन सार्वजनिक गरिसकेको छैन।