काठमाडौं । दैलेखको कर्णाली नदीमा खसेर बेपत्ता भएको गाडीका चालक तुलाराम सुवेदी ९ दिनपछि मृत अवस्थामा फेला परेका छन्।

प्रहरीका अनुसार असार २७ गते अछामको तुर्माखाँद गाउँपालिका–२ जमगडास्थित कर्णाली नदी किनारमा बेवारिसे अवस्थामा फेला परेको शवको पहिचान दुर्घटनामा बेपत्ता भएका चालक सुवेदीको रूपमा भएको हो। उनी सुर्खेतको पञ्चपुरी नगरपालिका–माझिगाउँका बासिन्दा हुन्।

यसअघि सोही दुर्घटनामा परेका कालिकोटको पचालझरना गाउँपालिका–९ का मेखे तिरुवाको शव फेला परिसकेको थियो।दुर्घटनामा रास्कोट नगरपालिका–२ खड्कागाउँकी सिर्जना खड्का र सहचालक रामप्रसाद सुवेदी अझै बेपत्ता रहेको प्रहरीले जनाएको छ। उनीहरूको खोजी कार्य जारी छ।

असार १८ गते सुर्खेतबाट कालिकोटतर्फ जाँदै गरेको कप्र ०२–००१ ख १०५५ नम्बरको मालवाहक गाडी दैलेखको चामुण्डा बिन्द्रासैनी नगरपालिका–७ साङ्गेतडामा सडकबाट कर्णाली नदीमा खसेर दुर्घटनामा परेको थियो।