काठमाडौं । आत्मदाहपछि उपचारका क्रममा निधन भएका गणेश नेपालीका परिवार र सरकारका प्रतिनिधिबीच वीर अस्पतालमा वार्ता जारी रहेको छ।

मृतकका परिवारले घटनाको निष्पक्ष छानबिन, दोषीमाथि कारबाही तथा पीडित परिवारलाई उचित क्षतिपूर्ति उपलब्ध गराउनुपर्ने माग राख्दै गणेशको शव अझै नबुझेका हुन्। यही विषयमा सहमति जुटाउने प्रयासस्वरूप सरकारी पक्षले परिवारसँग छलफल थालेको स्रोतले जनाएको छ।

स्रोतका अनुसार वार्ताको समन्वय गृहमन्त्री सुधन गुरुङनिकट मानिएका मुगुका नेता अनिल बानियाँले गरिरहेका छन्। प्रधानमन्त्रीको सचिवालयका प्रतिनिधिसमेत छलफलमा सहभागी रहेको बताइएको छ।

वार्तामा मृतक गणेश नेपालीका बुबा, आमा र दाजु सहभागी छन्। छलफललाई सीमित राख्न परिवारबाहेक अन्य व्यक्तिलाई प्रवेश दिइएको छैन। गणेशका बुबाआमालाई आजै मुगुबाट काठमाडौं ल्याइएको हो।

वार्ताबाट सहमति ननिस्किएसम्म परिवारले शव नउठाउने अडान कायम राखेको बुझिएको छ। यद्यपि, वार्ताको औपचारिक निष्कर्ष सार्वजनिक भइसकेको छैन।