तेहरान । इरानका पूर्व सर्वोच्च नेता आयातोल्लाह अली खामेनीको सम्मानमा सुरु भएको साताव्यापी शोक यात्रामा लाखौं श्रद्धालु सहभागी भइरहेका बेला नयाँ सर्वोच्च नेता मोज्तबा खामेनी भने सार्वजनिक रूपमा नदेखिएपछि उनको स्वास्थ्य र नेतृत्व भूमिकाबारे नयाँ अड्कलबाजी सुरु भएको छ।

तेहरानस्थित इमाम खामेनी ग्रान्ड मुसल्लाहबाट सुरु भएको श्रद्धाञ्जली कार्यक्रममा इराक, पाकिस्तान, टर्कीलगायत विभिन्न देशका उच्च अधिकारी सहभागी भएका छन्। इरानी सञ्चारमाध्यमका अनुसार शोक यात्रामा करोडौं मानिस सहभागी हुने अपेक्षा गरिएको छ।

यद्यपि समारोहको केन्द्रमा हुनुपर्ने मोज्तबा खामेनी आफ्नै बुवाको श्रद्धाञ्जली कार्यक्रममा समेत अनुपस्थित रहे। उनी सर्वोच्च नेता बनेयता सार्वजनिक रूपमा नदेखिएको र लिखित सन्देशमार्फत मात्र निर्देशन दिइरहेको बताइएको छ।

अन्तर्राष्ट्रिय सञ्चारमाध्यमहरूका अनुसार उनको अनुपस्थितिको कारणबारे इरानी अधिकारीहरूले औपचारिक जानकारी दिएका छैनन्। सुरक्षा जोखिम र स्वास्थ्य अवस्थालाई लिएर विभिन्न अनुमान सार्वजनिक भइरहेका भए पनि त्यसको स्वतन्त्र पुष्टि हुन सकेको छैन।

मोज्तबाको निरन्तर सार्वजनिक अनुपस्थितिले इरानको शक्ति हस्तान्तरण प्रक्रिया, नेतृत्वको प्रभावकारिता र भविष्यको राजनीतिक दिशाबारे अन्तर्राष्ट्रिय स्तरमा चासो अझ बढाएको विश्लेषण गरिएको छ।