काठमाडौं । राष्ट्रिय स्वतन्त्र पार्टी (रास्वपा)ले महाधिवेशनको मतपरिणाममा देखिएको त्रुटि सच्याउँदै केन्द्रीय सदस्यको संशोधित नतिजा सार्वजनिक गरेको छ।

निर्वाचन आयोगले पूजा बास्तोलाको उजुरीलाई सदर गरेपछि गण्डकी प्रदेशबाट उनलाई केन्द्रीय सदस्यमा निर्वाचित घोषणा गरिएको छ। यसअघि विजयी घोषित सोम शर्मा भने केन्द्रीय समितिबाट बाहिरिएका छन्।

यस्तै, जनजाति क्लस्टरतर्फ पनि नतिजा संशोधन गरिएको छ। उम्मेदवारीसम्बन्धी कागजात पुनः परीक्षणपछि कृष्णमान श्रेष्ठको स्थानमा ध्रुव थापामगरलाई निर्वाचित घोषणा गरिएको आयोगले जनाएको छ।

रास्वपाले प्राविधिक त्रुटिका कारण नतिजा फरक परेको स्वीकार गर्दै संशोधित सूची सार्वजनिक गरेको हो।