काठमाडौं । त्रिभुवन विश्वविद्यालयले ९० दिनभित्र ‘स्टुडेन्ट काउन्सिल (Voice of Students)’ गठन गर्ने र क्याम्पसभित्र रहेका दलीय विद्यार्थी संगठनका संरचना हटाउने प्रक्रिया अघि बढाएको जनाएको छ।

विश्वविद्यालयका अनुसार विद्यार्थीको सहभागिता बढाउन आवश्यक नियम संशोधन गरिनेछ। यस्तै, ट्रान्सक्रिप्ट, परीक्षा नतिजा, गुनासो व्यवस्थापनलगायतका सेवा थप प्रविधिमैत्री बनाइनेछ।

त्रिविले ट्रान्सक्रिप्टको आवेदन अवस्था मोबाइल एप वा वेबसाइटबाट हेर्न सकिने प्रणाली अन्तिम चरणमा रहेको जनाएको छ। साथै, विवरण नमिलेको ट्रान्सक्रिप्ट १५ दिनभित्र उपलब्ध गराउने व्यवस्था र २४ सै घण्टा सञ्चालन हुने गुनासो व्यवस्थापन प्रणाली पनि सञ्चालनमा ल्याउने तयारी गरिएको छ।