चितवन । प्रतिनिधि नामावली विवादका कारण सोमबारदेखि रोकिएको राष्ट्रिय स्वतन्त्र पार्टी (रास्वपा) को महाधिवेशन आज बिहानबाट पुनः सुचारु हुने भएको छ। न्यायिक समितिका नेता यज्ञमणि न्यौपानेका अनुसार बिहान १० बजेपछि मतदाता नामावली सार्वजनिक गरिनेछ।

नामावली प्रकाशनसँगै महाधिवेशनको निर्वाचन प्रक्रिया औपचारिक रूपमा अघि बढ्नेछ। त्यसपछि दाबी–विरोधको समय दिइने र त्यसपछि उम्मेदवारी दर्ता प्रक्रिया सुरु गरिने तयारी छ।

न्यौपानेका अनुसार अब सभापतिदेखि केन्द्रीय सदस्यसम्म सबै पदमा उम्मेदवारी खुला गरिने सहमति भएको छ।

पार्टीभित्र सुरुमा सभापति र वरिष्ठ नेतृत्वका लागि सहमतिमार्फत टुंग्याउने प्रयास भए पनि अन्ततः स्वयम् सभापति रवि लामिछाने र वरिष्ठ नेता बालेन्द्र शाहले पनि सबै पदमा प्रत्यक्ष प्रतिस्पर्धा (निर्वाचन) बाटै अघि बढ्ने धारणा राखेका छन्।

नेताहरूले महाधिवेशनलाई स्वस्थ प्रतिस्पर्धामा आधारित बनाउन र समूहगत ध्रुवीकरणलाई कडाइका साथ नियन्त्रण गर्ने सहमति भएको पनि बताएका छन्।