काठमाडौं । नेपाल दलित उत्पीडित केन्द्र कोशी प्रदेश समन्वय सम्पर्क समितिको भेला काठमाडौंमा सम्पन्न भएको छ। भेलाले संगठन विस्तार गर्दै आन्दोलनलाई थप सशक्त बनाउने निर्णय गरेको छ।

भेलामा केन्द्रका अध्यक्ष नन्दराज घतानी प्रमुख अतिथिका रूपमा उपस्थित रहेका थिए। भेलामा संगठनलाई प्रदेशस्तरमा थप व्यवस्थित र सक्रिय बनाउने उद्देश्यसहित कोशी प्रदेश तदर्थ समिति गठन गरिएको हो।

नवगठित तदर्थ समितिको संयोजकमा सागर खाती र सह–संयोजकमा कुमार विश्वकर्मा चयन भएका छन्। समितिले दलित तथा उत्पीडित समुदायको अधिकार, सम्मान र मुक्ति आन्दोलनलाई अझ सशक्त रूपमा अघि बढाउने निर्णय गरेको छ।

कार्यक्रममा मिन विश्वकर्माले तदर्थ समिति गठनसँगै संगठन विस्तार र आन्दोलनलाई प्रभावकारी बनाउने दिशामा महत्वपूर्ण कदम भएको बताए। उनले आगामी दिनमा समुदायका अधिकार सुनिश्चित गर्न व्यापक अभियान सञ्चालन गरिने जानकारी दिए।

भेलाले दलित उत्पीडित समुदायको मुक्ति आन्दोलनलाई संगठित, सशक्त र परिणाममुखी बनाउने प्रतिबद्धता व्यक्त गरेको छ।