काठमाडौं । नेकपा एमाले बागमती प्रदेश कमिटीले धान रोपाइँ तथा अन्य बाली लगाउने मुख्य सिजन सुरु भइसकेको भन्दै किसानलाई समयमै मल, बीउ र कृषि सामग्री उपलब्ध गराउन सरकारसँग माग गरेको छ।

बागमती प्रदेश कमिटीको दोस्रो बैठकले पारित गरेको प्रस्तावमा सिन्धुली, रामेछाप, दोलखा, सिन्धुपाल्चोक, काभ्रेपलाञ्चोक, नुवाकोट, रसुवा, धादिङ, मकवानपुर र चितवन लगायत जिल्लामा रोपाइँको तयारी तीव्र भइरहेका बेला किसानले मल र उन्नत बीउको अभाव झेल्न नपरोस् भनेर तत्काल आवश्यक व्यवस्था गर्न सरकारलाई आग्रह गरिएको छ।

बैठकले कृषि उत्पादन बढाउने कुरा भाषणमा मात्र सीमित नराखी किसानका आधारभूत आवश्यकतामा सरकारले विशेष ध्यान दिनुपर्ने जनाएको छ। हरेक वर्ष रोपाइँको समयमा मल अभाव दोहोरिने प्रवृत्तिप्रति चिन्ता व्यक्त गर्दै एमालेले कृषि क्षेत्रमा देखिएको अव्यवस्था अन्त्य गर्न प्रभावकारी पहल आवश्यक रहेको उल्लेख गरेको छ।

एमालेले खेतीयोग्य जमिन बाँझो रहने अवस्था आउन नदिन र किसानलाई उत्पादनमुखी बनाउन आवश्यक मल, बीउ–विजन तथा कृषि सामग्री सहज रूपमा उपलब्ध गराउन सरकारसँग जोडदार माग गरेको छ।