काठमाडौं । मकवानपुरको भीमफेदी-८ बैदमारमा गएराति भएको सवारी दुर्घटनाले फास्ट ट्र्याक आयोजनाले एक युवा इञ्जिनियर गुमाएको छ। दुर्घटनामा आयोजनामा कार्यरत २१ वर्षीय सूर्य यादव र चालक बोधराज बुढाथोकीको मृत्यु भएको हो।

माण्डु हाइड्रोपावरतर्फ जाँदै गरेको बाप्र०१–०३३च २१४४ नम्बरको योद्धा पिकअप अनियन्त्रित भई करिब १०० फिट तल खोलामा खसेपछि दुर्घटना भएको प्रहरीले जनाएको छ।

गम्भीर घाइते भएका दुवैजनालाई प्रहरी र नेपाली सेनाको टोलीले उद्धार गरी हेटौँडा अस्पताल पुर्‍याएको थियो। तर उपचारका क्रममा चिकित्सकले आज बिहान मृत घोषणा गरेका हुन्।

दुर्घटनापछि उक्त क्षेत्रको सडक सुरक्षामाथि पुनः प्रश्न उठेको छ। पछिल्ला महिनाहरूमा मकवानपुरका विभिन्न सडक खण्डमा दुर्घटनाका घटना बढ्दै गएका छन्।