काठमाडौं । नेपालमा अहिले पश्चिमी वायु, स्थानीय वायु तथा पूर्वी भूभाग नजिक रहेको न्यून चापीय क्षेत्रको प्रभाव देखिएको छ । यही प्रणालीका कारण देशका विभिन्न क्षेत्रमा बादल, वर्षा र तातो मौसमको मिश्रित अवस्था रहने भएको छ ।

जल तथा मौसम विज्ञान विभागका अनुसार आज कोशी, बागमती र गण्डकी प्रदेशमा सामान्यदेखि पूर्ण बदली रहनेछ भने अन्य प्रदेशका पहाडी तथा हिमाली क्षेत्रमा आंशिक बदली रहने सम्भावना छ । तराईका अधिकांश क्षेत्रमा भने मौसम मुख्यतः सफा रहने जनाइएको छ ।

आज दिउँसो कोशी, बागमती र गण्डकी प्रदेशका पहाडी तथा हिमाली भूभागका केही स्थानमा मेघगर्जन, चट्याङसहित मध्यम वर्षा हुने सम्भावना रहेको छ । गण्डकी प्रदेशका एक–दुई स्थानमा भारी वर्षा पनि हुन सक्ने विभागले चेतावनी दिएको छ । उच्च हिमाली क्षेत्रमा हल्का हिमपातको सम्भावना समेत रहेको छ ।

यता, लुम्बिनी र सुदूरपश्चिम प्रदेशका पहाडी तथा तराई क्षेत्रमा तातो दिन र तातो लहरको असर बढ्न सक्ने भएकाले सतर्कता अपनाउन आग्रह गरिएको छ ।

आज राति पनि कोशी, मधेश, बागमती र गण्डकी प्रदेशमा बदली रहनेछ । विशेषगरी कोशी प्रदेशका पहाडी तथा तराई क्षेत्रका केही स्थानमा भारी वर्षाको सम्भावना रहेकाले नदी किनार र पहिरो जोखिमयुक्त क्षेत्रमा सावधानी अपनाउन मौसमविद्ले सुझाव दिएका छन् ।