जनकपुरधाम । मधेश प्रदेशका मुख्यमन्त्री कृष्णप्रसाद यादवले आज दिउँसो १ बजे प्रदेशसभा बैठकमा विश्वासको मत लिने भएका छन्।

विश्वासको मतको पूर्वसन्ध्यामा मधेशको राजनीतिक समीकरण फेरबदल भएको छ। सत्ता जोगाउन नेपाली कांग्रेस, नेकपा (एमाले) र अन्य घटकबीच नयाँ तीन दलीय गठबन्धन बनेको छ।

यसैबीच मुख्यमन्त्री यादवले जसपा नेपालका तीन मन्त्रीलाई बर्खास्त गरेका छन् भने एमालेका मोहम्मद समिरलाई विनाविभागीय मन्त्री नियुक्त गरेका छन्।

जनमत पार्टीले गत वैशाख २१ गते सरकारबाट समर्थन फिर्ता लिएपछि प्रदेश सरकार संकटमा परेको थियो। त्यसपछि विश्वासको मत लिने तयारी भए पनि आन्तरिक असन्तुष्टि र राजनीतिक असमझदारीका कारण प्रक्रिया केही समय रोकिएको थियो।

नयाँ सत्ता समीकरण बनेपछि सरकारसँग १०७ सदस्यीय प्रदेशसभामा बहुमत पुग्ने दाबी गरिएको छ। विश्वासको मतका लागि ५४ सिट आवश्यक पर्छ भने नयाँ गठबन्धनसँग करिब ६१ सांसदको समर्थन रहेको बताइएको छ।

जसपा नेपालका तीन मन्त्री बर्खास्त भएपछि प्रदेश सरकारभित्र तनाव बढेको छ। जनमत पार्टी र जसपा नेपालका केही मन्त्रीले यसअघि नै राजीनामा दिइसकेका छन्।

आजको विश्वासको मत मतदान मधेश प्रदेशको राजनीतिक भविष्य निर्धारण गर्ने महत्वपूर्ण परीक्षणका रूपमा हेरिएको छ।