काठमाडौं । देशभर अहिले पश्चिमी वायु, स्थानीय वायु तथा नेपाल नजिक तल्लो वायुमण्डलमा विकसित न्यून चापीय क्षेत्रको प्रभाव कायम रहेको छ। यसको असरका कारण देशका विभिन्न भू–भागमा बदली, वर्षा र हिमपातको सम्भावना देखिएको छ।

जल तथा मौसम पूर्वानुमान महाशाखाका अनुसार हाल कोशी, बागमती र गण्डकी प्रदेशका हिमाली तथा पहाडी क्षेत्रमा सामान्यदेखि पूर्ण बदली रहेको छ भने अन्य भू–भागमा आंशिक बदली देखिएको छ। बागमती र गण्डकीका केही स्थान तथा कोशी प्रदेशका एक–दुई क्षेत्रमा मेघगर्जन र चट्याङसहित हल्कादेखि मध्यम वर्षा भइरहेको छ।

महाशाखाले आज दिउँसो कोशी, बागमती र गण्डकी प्रदेशसहित देशका अधिकांश हिमाली तथा पहाडी क्षेत्रमा बदली रहने जनाएको छ। तराईका भू–भागमा भने आंशिक बदली रहने सम्भावना छ। कोशी, बागमती र गण्डकीका केही स्थानसहित अन्य पहाडी तथा हिमाली क्षेत्रमा मेघगर्जन, चट्याङसहित मध्यम वर्षा हुन सक्ने पूर्वानुमान गरिएको छ। उच्च हिमाली क्षेत्रमा हल्का हिमपातको सम्भावना पनि रहेको छ।

आज राति पनि मौसममा पूर्ण सुधार नआउने मौसमविद्ले बताएका छन्। कोशी, मधेस, बागमती र गण्डकी प्रदेशका पहाडी तथा हिमाली क्षेत्रमा सामान्यदेखि पूर्ण बदली रहनेछ भने अन्य क्षेत्रमा आंशिक बदली रहने अनुमान गरिएको छ।

मौसम पूर्वानुमान महाशाखाका अनुसार कोशी, मधेस, बागमती र गण्डकीका केही स्थान तथा कर्णाली र सुदूरपश्चिमका उच्च हिमाली क्षेत्रमा मेघगर्जनसहित वर्षा र हिमपात हुन सक्ने भएकाले सतर्कता अपनाउन आग्रह गरिएको छ।

विशेषगरी पहाडी क्षेत्रमा यात्रा गर्ने, नदी तटीय क्षेत्रमा बसोबास गर्ने तथा कृषि कार्यमा संलग्न नागरिकलाई मौसमको अद्यावधिक जानकारी लिएर मात्रै योजना बनाउन मौसमविद्ले सुझाव दिएका छन्।