लुम्बिनी । बुद्धजयन्तीको अवसरमा हरेक वर्ष जस्तै यसपटक पनि विशेष समारोह आयोजना गरिए पनि प्रधानमन्त्रीको अनुपस्थितिले आलोचना चुलिएको छ।

नेपालका सरकारप्रमुख लुम्बिनीमा उपस्थित हुने विगतको परम्परा रहेको भए पनि यस वर्ष प्रधानमन्त्री समारोहमा सहभागी नभएपछि त्यसलाई परम्परा तोडिएको रूपमा हेरिएको छ। यसले सरोकारवालाहरूबीच असन्तुष्टि र आलोचना चुलिएको हो।

बुद्धजयन्ती का अवसरमा अघिल्ला वर्षहरूमा दिनभर विभिन्न धार्मिक, सांस्कृतिक कार्यक्रम तथा शान्ति पदयात्रासहित उत्सव मनाइने गरिन्थ्यो। तर यस वर्ष कार्यक्रम तालिका परिवर्तन भई बिहान ६ बजे नै औपचारिक समारोह राखिएको थियो।

यस परिवर्तनका कारण शान्ति पदयात्राजस्ता महत्त्वपूर्ण कार्यक्रमहरू स्थगित गर्नुपरेको आयोजकहरूले जनाएका छन्। स्थानीयवासी र सरोकारवालाहरूले यसले लुम्बिनीको धार्मिक र अन्तर्राष्ट्रिय महत्वमा असर पार्ने चिन्ता व्यक्त गरेका छन्।

प्रधानमन्त्रीको अनुपस्थितिबारे सरकारको तर्फबाट हालसम्म औपचारिक प्रतिक्रिया आएको छैन।