काठमाडौं । काठमाडौं उपत्यकामा अतिक्रमित तथा नदी किनारका बस्ती हटाउने सरकारी अभियान दोस्रो चरणमा प्रवेश गरेको छ। सोही क्रममा आज बिहानै बल्खु क्षेत्रमा डोजर पुगेसँगै स्थानीयमा तनावको अवस्था देखिएको छ।

घरटहरा भत्काउने तयारीसँगै ठूलो संख्यामा प्रहरी परिचालन गरिएको छ भने प्रभावित बासिन्दाहरू अझै पनि सामान सार्न व्यस्त देखिन्छन्। डोजर पुगेपछि धेरै परिवार अन्तिम क्षणसम्म आफ्नो सरसामान सुरक्षित स्थानतर्फ लैजान दौडधूप गरिरहेका छन्।

जिल्ला प्रशासन कार्यालय काठमाडौंले यसअघि नै सूचना जारी गर्दै बिहीबार साँझसम्म बस्ती खाली गर्न अल्टिमेटम दिएको थियो। सोही सूचनापछि प्रभावित क्षेत्रका बासिन्दाहरूले धमाधम घर खाली गर्ने र सामान सार्ने काम सुरु गरेका थिए, जुन क्रम आज बिहानसम्म पनि जारी रहेको छ। सरकारले आजदेखि टेकुको वंशीघाट, शंखमूल, बुद्धनगर, बल्खु, कुलेश्वर, कपन, वसुन्धारा, गोंगबु, बालाजु र माछापोखरीलगायतका क्षेत्रमा अतिक्रमित जग्गा खाली गराउने तयारी गरेको जनाएको छ।

यसअघि पहिलो चरणअन्तर्गत सिनामंगलको गैरीगाउँ, शान्तिनगर, मनोहरा र थापाथली क्षेत्रका बस्तीहरू हटाइसकिएको छ।