काठमाडौं । नेकपा (एमाले) का महासचिव शंकर पोखरेल ले पार्टीले अंगिकार गरेको मार्गदर्शक सिद्धान्त जनताको बहुदलीय जनवाद (जबज) का सामु लोकप्रियतावाद, अराजकतावाद र अवसरवाद दीर्घकालीन चुनौती नभई अस्थायी प्रवृत्ति मात्र भएको बताएका छन्।

नेपाल कम्युनिष्ट पार्टीको स्थापना दिवसको अवसरमा सामाजिक सञ्जालमार्फत धारणा सार्वजनिक गर्दै पोखरेलले एल्गोरिदम र डिजिटल माध्यमले निर्माण गरेको लोकप्रियतावादी राजनीति क्षणिक हुने उल्लेख गरेका छन्। उनले लेखेका छन्, “जबजका समृद्ध विचारका सामु एल्गोरिदमले सिर्जना गरेको लोकप्रियतावाद, अराजकतावाद र अवसरवाद केही समयका पाहुना जस्तै हुन्।”

महासचिव पोखरेलले कम्युनिष्ट आन्दोलनको गौरवपूर्ण इतिहासप्रति सम्मान व्यक्त गर्दै समाजवादतर्फको यात्रामा दृढ रहनुपर्नेमा जोड दिएका छन्। उनले स्थापना दिवसलाई केवल औपचारिक कार्यक्रम नभई वैचारिक प्रतिबद्धता नवीकरण गर्ने अवसरका रूपमा लिनुपर्ने बताए।

यस अवसरमा उनले नेपाल कम्युनिष्ट आन्दोलनका संस्थापक पुष्पलाल श्रेष्ठ, नारायणविलास जोशी, निरञ्जन गोविन्द वैद्य, नरबहादुर कर्मचारी र मोतीदेवी श्रेष्ठ लगायतका नेताहरूको योगदानको स्मरण गरेका छन्।

महासचिव पोखरेलले आज पार्टी केन्द्रीय कार्यालयमा आयोजना गरिएको ७७औँ स्थापना दिवस कार्यक्रममा काठमाडौं उपत्यकामा रहेका नेता–कार्यकर्ता तथा शुभेच्छुकहरूलाई सहभागी हुन आग्रह गरेका छन्। साथै, काठमाडौं बाहिर रहेका पार्टी कमिटीहरूले आयोजना गर्ने कार्यक्रममा पनि सक्रिय सहभागिताको अपिल गरेका छन्।