काठमाडौं । साताको पहिलो कारोबार दिन सोमबार सेयर बजार परिसूचक (नेप्से) १३.१७ अंकले घटेर २८२५ अंकमा झरेको छ।

कारोबार सुरु भएको केही मिनेटमै नेप्से २८४५ अंकसम्म पुगे पनि दिनभरको उतारचढावपछि बजार घटेर बन्द भएको हो। अघिल्लो दिन ५ अंकले बढेको बजार आज भने दबाबमा देखियो। आज कारोबार रकम पनि घटेर ५ अर्ब ४३ करोड रुपैयाँमा सीमित भएको छ, जुन अघिल्लो दिन ७ अर्ब ४६ करोड थियो।

आज ६५ कम्पनीको सेयर मूल्य बढ्दा १९७ कम्पनीको घट्यो भने ६ कम्पनी स्थिर रहे। क्षेत्रगत सूचकमा होटल तथा पर्यटन समूह १.०१ प्रतिशतले बढेको छ। तर अन्य सबै समूह घटेका छन्। बैंकिङ ०.८४, विकास बैंक ०.१६, फाइनान्स ०.७०, हाइड्रोपावर ०.२३, लगानी ०.८४, जीवन बीमा ०.६२, उत्पादन तथा प्रशोधन ०.८४, माइक्रोफाइनान्स ०.४९, निर्जीवन बीमा ०.११, अन्य ०.४० र व्यापार समूह ०.३३ प्रतिशतले घटे।

आज ४ कम्पनीको सेयर मूल्य १५ प्रतिशतले वृद्धि भएको छ। ती कम्पनीहरूमा सूर्यकुण्ड हाइड्रो इलेक्ट्रिक, होटल फरेस्ट इन, पाल्पा सिमेन्ट इन्डस्ट्रिज र शिखर पावर रहेका छन्। त्यस्तै झापा इनर्जी ११.८८ प्रतिशत, रिजलाइन इनर्जी १०.९९ प्रतिशत र सुपर खुदी हाइड्रोपावर ५.३५ प्रतिशतले बढे।

अर्कोतर्फ दोल्ती पावर ५.३५ प्रतिशत र एसियन हाइड्रोपावर ४.५० प्रतिशतले घटेका छन्। आज धेरै कारोबार हुने कम्पनीहरूमा होटल फरेस्ट इन, सोलु हाइड्रोपावर, नेसनल हाइड्रोपावर, आँखुखोला जलविद्युत् र रिलायन्स स्पिनिङ मिल्स रहेका छन्।