मकवानपुर । भीमफेदी गाउँपालिकामा चालू आर्थिक वर्षमा रैथाने बाली कोदो उत्पादनमा उल्लेखनीय वृद्धि भएको छ। गाउँपालिकाका अध्यक्ष हिदम लामाका अनुसार यस वर्ष कुल ४३७ परिवारले १,८९७ रोपनी क्षेत्रफलमा कोदो खेती विस्तार गरेका छन्।

उक्त खेतीबाट करिब ५५० मेट्रिक टन कोदो उत्पादन भएको कृषि शाखाले जनाएको छ। उत्पादनलाई प्रवर्द्धन तथा कृषकलाई प्रोत्साहन गर्न गाउँपालिकाले उत्पादनमा आधारित अनुदान कार्यक्रमअन्तर्गत कृषकहरूलाई कुल ३३ लाख ८३ हजार रुपैयाँ नगद अनुदान वितरण गरेको छ।

गाउँपालिकाले रैथाने बालीको संरक्षण, खाद्य सुरक्षा सुदृढीकरण तथा कृषकको आयआर्जन वृद्धि गर्ने उद्देश्यले कोदो खेतीलाई प्राथमिकतामा राख्दै विभिन्न प्रवर्द्धनात्मक कार्यक्रमहरू सञ्चालन गर्दै आएको जनाएको छ।

स्थानीय तहका अनुसार कोदो उत्पादन वृद्धि भएपछि गाउँपालिकामा आत्मनिर्भरता बढ्दै गएको र ग्रामीण अर्थतन्त्रमा सकारात्मक प्रभाव परेको छ।