काठमाडौं । पूर्णबहादुर खड्का ले नेपाली कांग्रेस का निवर्तमान पदाधिकारी तथा केन्द्रीय सदस्यहरूको बैठक बोलाएका छन्। बैठक शनिबार दिउँसो ३:३० बजे काठमाडौंको गोल्फुटारस्थित उनको निवासमा बस्ने जनाइएको छ।

सर्वोच्च अदालत ले पार्टीको आधिकारिकतासम्बन्धी दायर रिट खारेज गरेपछि उत्पन्न परिस्थितिबारे छलफल गर्न खड्काले बैठक आह्वान गरेका हुन्। अदालतको निर्णयपछि अब पार्टीभित्र अपनाइने आगामी रणनीतिबारे परामर्श गर्न उनी सक्रिय भएका छन्।

शनिबार बिहानदेखि नै खड्का आफ्ना निकटस्थ नेताहरूसँग आन्तरिक छलफलमा जुटेका छन्। सो क्रममा इन्द्रबहादुर बानियाँ र केदार कार्की लगायतका नेताहरू उनको निवास पुगेका थिए।

यसैबीच, केन्द्रीय सदस्यहरू मीन विश्वकर्मा, गुरुराज बराल, नैनसिंह महर, कुन्दनराज काफ्ले र उर्मिला थपलियालगायत नेताहरूसँग पनि खड्काले परामर्श गरेका छन्।

स्रोतका अनुसार अदालतको निर्णयपछि विकसित राजनीतिक अवस्थाबारे समेटेर खड्काले चाँडै औपचारिक धारणा सार्वजनिक गर्ने तयारी गरेका छन्। सम्भवतः आइतबारसम्म उनको आधिकारिक वक्तव्य आउने अपेक्षा गरिएको छ।