काठमाडौं । नेपाली कांग्रेसले पार्टीभित्र समानान्तर गतिविधि गरेको आरोपमा निवर्तमान सभापति पूर्णबहादुर खड्कासँग स्पष्टीकरण सोध्ने तयारी गरेको छ।

पार्टीको आधिकारिक लेटरप्याड प्रयोग गर्दै कार्यवाहक सभापतिको हैसियतमा पटक–पटक विज्ञप्ति जारी गरेपछि कांग्रेस नेतृत्व असन्तुष्ट बनेको हो। यस विषयमा केन्द्रीय अनुशासन समितिको बुधबार बस्ने बैठकले औपचारिक निर्णय गर्ने तयारी गरेको एक शीर्ष नेताले बताएका छन्।

खड्काले हालै कार्यवाहक सभापतिको हैसियतमा विज्ञप्ति जारी गर्दै क्रियाशील सदस्यता खारेज गर्ने निर्णयप्रति आपत्ति जनाएका थिए। त्यसअघि पनि उनले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको पक्राउको विरोध गर्दै वक्तव्य सार्वजनिक गरेका थिए।

यस्तै, उनले १४औँ महाधिवेशनबाट निर्वाचित केन्द्रीय कार्यसमितिको बैठकसमेत कार्यवाहक सभापतिको हैसियतमा बोलाएका थिए, जसलाई पार्टीभित्र ‘समानान्तर गतिविधि’का रूपमा लिइएको छ।

यसअघि १८ चैतमा बसेको अनुशासन समितिको बैठकले यस्ता गतिविधिलाई गम्भीर अनुशासन उल्लंघन मानेर कारबाही प्रक्रिया अघि बढाउने संकेत दिएको थियो।

अब बस्ने बैठकपछि खड्कासँग स्पष्टीकरण माग्ने र आवश्यक परे थप कारबाही गर्ने विषयमा कांग्रेसले निर्णय गर्नेछ।